შეიძლება ითქვას, რომ საქორწილო მოსაწვევები თქვენი ქორწილის ,,სავიზიტო ბარათია“ ეს არის პირველი შთაბეჭდილებაც, ამაღელვებელი ემოციებით სავსე მოლოდინიც და სამახსოვრო დეტალიც, რომელიც წლების შემდეგ გაგახსენებთ უდავოდ ერთ-ერთ ყველაზე ნათელ და ბედნიერებით სავსე დღეს. ამ სტატიაში გადავწყვიტეთ შეგვეკრიბა საქორწილო მოსაწვევების მომზადების მინი-გიდი, რომელიც უპასუხებს წყვილების ყველაზე ხშირად დასმულ კითხვებს.

როგორი დიზაინი შევარჩიო?

პატარძლების ერთ-ერთი ყველაზე ხშირი შეცდომა, რომელსაც ,,მათი“ დიზაინის შერჩევისას უშვებენ - არ ადგენენ მუდბორდს. ძალიან მნიშვნელოვანია გესმოდეთ და გრძნობდეთ იმ ხასიათს, რომლის მატარებელიც იქნება თქვენი ქორწილი. უმჯობესია ეს ყველაფერი მუდბორდის დახმარებით გააკეთოთ. ჩამოყალიბდით ესთეტიკასა და სტილზე, რომელიც ყველაზე მეტად მოგწონთ და რომელიც თქვენს ხასიათს უსვამს ხაზს. როგორც კი დიზაინერები ნახავენ მას - ისინი ზედმიწევნით შეარჩევენ შრიფტს, ჩრდილებსა და დიზაინს, რომელიც იდეალურად შეერწყმება თქვენი ქორწილის კონცეფციას.

რა დავწეროთ მოსაწვევებში?

როგორც წესი, მოსაწვევებში წყვილი ქორწილის შესახებ დეტალურ ინფორმაციას წერს: თარიღი, დრო და ადგილმდებარეობა. ამ ყველაფრის წინ, ყოველთვის არის მცირე სადღესასწაულო და თბილი შესავალი, რომელშიც აუცილებელია მიუთითოთ თქვენი სტუმრის სახელი. ალბათ დამეთანხმებით, რომ პერსონალური მოსაწვევი - ნებისმიერ შემთხვევაში ძალიან სასიამოვნო დეტალია. ძირითადი ინფორმაციის გარდა შეგიძლიათ მიუთითოთ თქვენი ქორწილის კიდევ რამდენიმე მნიშვნელოვანი დეტალები. მაგალითად, დრეს-კოდი ან ვიშ-ლისტი.

ქაღალდზე თუ ვირტუალურ სივრცეში?

თუ თქვენთვის ძალიან მნიშვნელოვანია ტაქტიანობა და შესაძლებლობა პირადად გადასცეთ ხელში სტუმარს ქაღალდის საქორწილო მოსაწვევი, მაშინ არჩევანი ლამაზ ქაღალდზე დაბეჭდილ მოსაწვევებზე შევაჩეროთ. თქვენ მის შენახვას მრავალი წლის განმავლობაში შეძლებთ, როგორც ძალიან მნიშვნელოვანი დეტალი, რომელსაც თქვენს შვილებს ან შვილიშვილებსაც კი გადასცეთ სამახსოვროდ. თუ რაიმე უფრო თანამედროვე გსურთ, შეგიძლიათ მოსაწვევების ნახევრად გამჭირვალე პლასტიკური ბარათებისგან დაამზადოთ.

როგორ გადავცეთ სტუმრებს?

მინიმალისტური კონვერტები, ან ელეგანტური მინი-ყუთები - საქორწილო მოსაწვევის შესაფუთად იდეალური ვარიანტებია. სცადეთ მათში მოათავსოთ ლამაზი ნაჭერი, ხრაშუნა თხელი, ფერადი ქაღალდები ან ცოტაოდენი პაწაწუნა ყვავილები - ეს ყოველივე შექმნის ღიმილისმომგვრელ და სასიამოვნო განწყობას, სანამ თქვენი მეგობრები და ახლობლები მოსაწვევების გახსნის პროცესით იქნებიან დაკავებულები.